Hayyuu beekamaa Oromoo Keeniyaa Pirofeesar Abdullaahii Shoongoloo lubbuun darban

Hayyuu fi antropooloojistii beekamaa Oromoo Keeniyaa Pirofeesar Abdullaahii Shoongoloo du'aan boqotaniiru. Qorataan seenaa fi aadaa Jaatani Diida akka ibsanitti, piroofeesarichi jireenya isaanii guutuu aadaa fi seenaa ummata Oromoo kan Keeniyaa fi Itoophiyaa sadarkaa idil-addunyaatti beeksisuuf wareegama guddaa kaffalaniiru.

Hojiilee isaanii guguddoo keessaa kitaaba piroofeesara Jarman Pirofeesar Gunter Shlee waliin barreessan kanneen akka 'Pastoralism and Politics in Northern Kenya and Southern Ethiopia' fi 'Islam and Ethnicity in Northern Kenya and Southern Ethiopia' ni argamu. Kana malees, afoola fi mammaaksa aadaa Boorana kan ta'e 'Boran Proverbs in Their Cultural Context' jedhu qopheessaniiru. Hojiileen kun seenaa Oromoo, jireenya horsiisee bulaa fi sirna bulchiinsa aadaa, keessattuu sirna Gumi Gaayoo, beekamtii idil-addunyaa akka argatu gargaareera.