የሶማሊያ የባህር ላይ ወንበዴዎች የኢራንን መርከብ በአፍሪካ ቀንድ አጠገብ ያገቱ

የሶማሊያ የባሕር ላይ ወንበዴዎች 23 ሰዎችን የጫነች የአዚኒ የተባለች የኢራን የአሳ አጥማጅ መርከብ በቁጥጥራቸው ሥር አዋሉ። መርከቧ የተጠለፈችው ባለፈው ሐሙስ ዕለት በሰሜን ምሥራቅ ሶማሊያ በሚገኙት የባንዳር ባይላ እና የሀፉን ከተሞች መካከል ስትጓዝ እንደነበር የፑንትላንድ የባሕር ላይ ፖሊስ እሁድ ዕለት ባወጣው መግለጫ አስታውቋል። የሕንድ ውቅያኖስ የባሕር ላይ ደህንነት ማዕከል ወንበዴዎቹ በዚህ አካባቢ በሚያልፉ የንግድ መርከቦች ላይ ተጨማሪ ጥቃቶችን ሊፈጽሙ እንደሚችሉ በማስጠንቀቅ ከፍተኛ ጥንቃቄ እንዲደረግ አሳስቧል። የባህር ላይ ወንበዴዎች በተለይም በሶማሊያ የባህር ዳርቻ አካባቢዎች እንደገና ማገርሸታቸው ለቀጠናው ደህንነት ስጋት ሆኗል።