ሩሲያ በኢትዮጵያ እና በኤርትራ መካከል የሽምግልና ሚና ልትጫወት ትችላለች ተባለ

የሩሲያ የውጭ ጉዳይ ሚኒስትር ሴርጌ ላቭሮቭ በኢትዮጵያ እና በኤርትራ መካከል የተቋረጠውን ዲፕሎማሲያዊ ግንኙነት ለማደስ የሽምግልና ሚና ለመጫወት ዝግጁ መሆናቸውን ገለጹ። ይህ አስተያየት የተሰጠው በሩሲያ-አፍሪካ ጉባዔ ዋዜማ ሲሆን፣ የሁለቱ አገራት መሪዎች በአንድ መድረክ እንደሚታደሙ ይጠበቃል። ተንታኞች እንደሚሉት፣ ሩሲያ በቀይ ባሕር አካባቢ ተፅዕኖዋን ለማሳደግ እና ኢትዮጵያ የባሕር በር ለማግኘት የምታደርገውን ጥረት በተመለከተ ሚዛናዊ አቋም ለመያዝ ትፈልጋለች።

ባለሙያዎች በሁለቱ አገራት መካከል ያለው የዲፕሎማሲያዊ ግንኙነት መቋረጥ ለግጭት ሊዳርግ ይችላል የሚል ሥጋት አላቸው። ላቭሮቭ አገራቸው ቀደም ሲልም የሁለቱን አገራት ግንኙነት ለማሻሻል ጥረት ማድረጓን በማስታወስ፣ አሁን ላይ ልዩነቶችን በሰላማዊ መንገድ መፍታት እና ግጭትን መከላከል እንደሚገባ ተናግረዋል። አንዳንድ ተንታኞች ኤርትራ እና ግብፅ ሩሲያ በሽምግልናዋ እንድትሳተፍ እንደሚፈልጉ ይገምታሉ።