Magaalaa Naqamteetti dargaggeessi mallaqa fi ragaa barnootaa sobaa maxxansaa ture to'annoo jala oole

Magaalaa Naqamteetti dargaggeessi tokko mallaqa Itoophiyaa sobaa fi ragaa barnootaa sobaa maxxansaa ture to'annoo jala oole. Poolisiin mana jireenyaa shakkamaa sanaa sakatta'uudhaan birrii sobaa 33,600 fi meeshaalee elektirooniksii hojii kanaaf oolan to'annoo jala oolche. Shakkamaan kun ji'a tokko dura irraa eegalee maashiniiwwan gurguddaa fayyadamuun mallaqa sobaa kana oomishaa akka ture ibsameera. Mallaqni kun naannolee baadiyyaa garaa garaatti akka raabsamaa ture poolisiin beeksise. Qajeelchi Poolisii magaalattii, hawaasni daldala yeroo raawwatu mallaqa fudhatu sirriitti akka sakatta'u fi shakkii yoo qabaate poolisii beeksisu akka qabu gorseera.