የአዲስ አበባ አስተዳደር የኑሮ ውድነትን ለመግታት አዳዲስ እርምጃዎችን እያጠና ነው

የአዲስ አበባ ከተማ አስተዳደር የምግብ እና የቤት ኪራይ ዋጋ ንረትን ለመግታት የ500 ሚሊዮን ብር ተጨማሪ ተዘዋዋሪ ፈንድ ለሸማቾች ህብረት ስራ ማህበራት መድቧል። አስተዳደሩ የሸማቾች ህብረት ስራ ማህበራትን አቅም በማጠናከር፣ የገበያ ተቆጣጣሪዎች ቁጥርን በመጨመር እና የገበያ ቦታዎችን በማስፋፋት የዋጋ ንረትን ለመቆጣጠር አቅዷል። በከተማው መግቢያ መንገዶች ቀጥታ አምራቾች ለተጠቃሚዎች የሚሸጡባቸው የገበያ ማዕከላት እንዲቋቋሙ እና የእሁድ ገበያዎች እንዲስፋፉ ተወስኗል። አስተዳደሩ ያለ አግባብ ዋጋ የሚጨምሩ ነጋዴዎች ላይ እርምጃ እንደሚወስድ ያስታወቀ ሲሆን፣ ነዋሪዎችም ጥሰቶችን እንዲያጋልጡ ጥሪ አቅርቧል። የቤት ኪራይን በተመለከተም አስተዳደሩ የኪራይ ውሎችን በህግ እንዲመሩ ማሳሰቢያ ሰጥቷል። ሆኖም እርምጃዎቹ ተፈጻሚ የሚሆኑበትን ጊዜ ወይም የቤት ኪራይ ዋጋ ጣሪያ መኖሩን በተመለከተ ዝርዝር መግለጫ አልተሰጠም።