Muummichi Ministeeraa Abiy furmaata Afrikaa ta'e akka barbaadamu gaafatan

Muummichi Ministeeraa Abiy Ahimad magaalaa Baahir Daaritti guca 12ffaa 'Tana High-Level Forum on Security in Africa' irratti argamuun haasaa taasisaniiru. Haasaa isaanii kanaanis, Afrikaan jijjiirama sirna addunyaa keessatti harka qabaachuu akka qabduu fi murtoo alaa dhufan qofa fudhachuu irra, furmaata mataa ishee uumuu akka qabdu dubbataniiru. Afrikaan walta'iinsa diinagdee fi siyaasaa cimsuun of danda'uu akka qabdu dhaamaniiru.

Haala Itoophiyaa ilaalchisee, mootummaan nagaa biyyattii mirkaneessuuf lammilee eeguu, seera kabachiisuu fi mariif balbala bananii turuu akka barbaadu ibsaniiru. Marii Biyyaalessaa irratti mootummaan cichoominaan akka jiru kan dubbatan yoo ta'u, karaa nagaa kan filatan hunda simachuuf qophii ta'uu isaanis beeksisaniiru. Dabalataanis, filoosofii 'Maddamar' rakkoolee waloo furuuf faayidaa qabaachuu isaa eeraniiru.