የአፍሪካ ህብረት ለጋራ ጥምረትና ለኢኮኖሚ ሉዓላዊነት ጥሪ አቀረበ

የአፍሪካ ህብረት ኮሚሽን ምክትል ሊቀመንበር ሴልማ ሀዳዲ በባህር ዳር እየተካሄደ ባለው 12ኛው የጣና ከፍተኛ የደህንነት መድረክ ላይ ንግግር አድርገዋል። የአፍሪካ ህብረት ምክትል ሊቀመንበር፣ አህጉሪቱ እየተቀያየረ ባለው ዓለም አቀፍ ሥርዓት ውስጥ በግልፅ ዓላማ እና በጋራ ጥቅም መመራት እንዳለባት አሳስበዋል። ለዘላቂ ሰላም የፖለቲካ ቁርጠኝነት እና ጠንካራ ኢኮኖሚ እንደሚያስፈልግ ገልጸው፣ የአህጉሪቱ የተፈጥሮ ሃብት ለአፍሪካውያን ተጠቃሚነት መዋል እንዳለበት ጠቁመዋል።

ከዚህ በተጨማሪም ሀዳዲ የአፍሪካ አህጉራዊ ነፃ የንግድ ቀጠና (AfCFTA) አተገባበርን በማፋጠን አህጉራዊ ውህደትን ማጠናከር እንደሚያስፈልግ አስምረውበታል። የተፈጥሮ ሃብት አጠቃቀም ግልጽነት እንዲኖረው እና የህብረተሰቡን ተጠቃሚነት እንዲያረጋግጥ ጥሪ አቅርበዋል። የወጣቶች ተሳትፎ በሰላም ግንባታ እና በዲጂታል ፈጠራ ላይ ወሳኝ መሆኑን የገለጹት ምክትል ሊቀመንበሯ፣ የአፍሪካ ህብረት ለወጣቶች የሥራ ዕድል መፍጠር ላይ ትኩረት እንደሚያደርግ አረጋግጠዋል።