Pirezedantiin Gamtaa Afrikaa hogganoota Afrikaa nageenyaaf akka hojjetan gaafatan

Pirezedantiin Gamtaa Afrikaa fi pirezidaantiin biyya Burundi Evariste Ndayishimiye, yaa'ii nageenyaa 12ffaa 'Tana Forum' irratti argamuun hogganoota Afrikaaf dhaamsa dabarsaniiru. Isaanis, rakkoolee nageenyaa Afrikaa keessatti mul'atan ittisuuf sirna akeekkachiisa duraa gara gochaatti jijjiiruun akka barbaachisu ibsaniiru. Biyyoonni Afrikaa meeshaalee nageenyaa fi qaamolee dhimmi nageenyaa ilaallatu qabaatanis, yeroo rakkoon uumamu ariifatee tarkaanfii fudhachuu irratti hanqinni akka jiru eeraniiru. Akkasumas, guddina diinagdee, daldala alaa, fi liqii irraa walaba ta'uun nageenyaaf murteessaa akka ta'e dubbataniiru. Pirezidaantichi, nageenyi waaraan injifannoo waraanaan osoo hin taane, mariin akka argamu hubachiisuun, carraan hojii dargaggootaa fi hirmaannaan dubartootaa nageenyaaf barbaachisaa ta'uu ibsaniiru.