የቀድሞ የአፍሪካ ህብረት ኮሚሽን ሊቀመንበር የአፍሪካን ኢኮኖሚ መዋቅር መቀየር አስፈላጊ መሆኑን አስታወቁ

የቀድሞ የአፍሪካ ህብረት ኮሚሽን ሊቀመንበር ንኮሳዛና ድላሚኒ-ዙማ፣ የአፍሪካ ሀገራት ጥሬ ዕቃዎችን ከመላክ ይልቅ የራሳቸውን ኢንዱስትሪ በማልማት የሀብት ባለቤት መሆን እንዳለባቸው ተናገሩ። በሩሲያ-አፍሪካ ጉባኤ ወቅት ከኢዜአ ጋር በነበራቸው ቃለ ምልልስ፣ አህጉሪቱ ሀብታም ሆና በድህነት መማቀቋን “የአፍሪካ ፓራዶክስ” ሲሉ ገልጸውታል። የትምህርት ጥራትን በማሳደግ የወጣቶችን የሥራ ዕድል መፍጠር እና በአህጉሪቱ የውስጥ ንግድ በተለይም በአፍሪካ አህጉራዊ የነፃ ንግድ ቀጠና (AfCFTA) አማካኝነት ከውጭ ጥገኝነት መውጣት እንደሚያስፈልግ አጽንኦት ሰጥተዋል። በተጨማሪም፣ የምግብ ሉዓላዊነትን ለማረጋገጥ መሬትን በአግባቡ መጠቀም እና የሰዎችና የዕቃዎች ነፃ ዝውውር መኖር የኢኮኖሚ እድገት ቁልፍ መሆኑን አንስተዋል። አህጉሪቱ በዓለም አቀፍ መድረኮች ተፅእኖ ለመፍጠር በአንድ ድምፅ መናገር እንዳለባትም አስታውሰዋል።