ኢትዮጵያ ከሁዋዌ ጋር ያላትን የዲጂታል አጋርነት ለማጠናከር መስማማቷ ተገለጸ

ምክትል ጠቅላይ ሚኒስትር ተመስገን ጥሩነህ የሁዋዌ ኢትዮጵያ ዋና ስራ አስፈፃሚ ኤሪክ ዩዋንን በማነጋገር በሀገሪቱ የዲጂታል ኢኮኖሚ እና የወደፊት የትብብር ዕድሎች ላይ ተወያይተዋል። ውይይቱ የኢትዮጵያን የዲጂታል 2030 ስትራቴጂ ለማሳካት የሚያስችል የኢንፎርሜሽን ኮሙዩኒኬሽን ቴክኖሎጂ መሠረተ ልማት ማስፋፊያን፣ ሀገር በቀል አቅም መገንባትን እና የቴክኖሎጂ ሽግግርን ያማከለ ነው። ተመስገን እንዳስታወቁት፣ የዲጂታል ትራንስፎርሜሽኑ የሀገሪቱን ብሔራዊ ጥቅምና ቅድሚያ ለሚሰጣቸው ጉዳዮች ያተኮረ መሆን አለበት። ሁዋዌ በኢትዮጵያ የዲጂታል መሰረተ ልማት ግንባታ ውስጥ ትልቅ ሚና እየተጫወተ እንደሚገኝ የገለጹት ምክትል ጠቅላይ ሚኒስትሩ፣ ትብብሩ ለዜጎች ተጨባጭ ጥቅም በሚሰጥ መልኩ መቀጠል እንዳለበት አጽንኦት ሰጥተዋል። ሁለቱ ወገኖች በጋራ ስምምነታቸው መሰረት የዲጂታል ኢኮኖሚውን ለማዘመን እና ለዘላቂ ልማት ውጤታማ ስራዎችን ለመስራት ተስማምተዋል።