የዴንማርክ ዲፕሎማት የኢትዮጵያን የኢነርጂ ዘርፍ እድገት አወደሱ

የዴንማርክ ኤምባሲ አማካሪ ቶማስ ፍሉሪን ሶረንሰን በኢትዮጵያ እየተከናወነ ያለውን የኢነርጂ ልማት አድንቀዋል። በአዲስ አበባ በተካሄደው የሶስተኛው የኢትዮጵያ የውሃ እና ኢነርጂ ሳምንት ላይ የተገኙት ዲፕሎማቱ፣ የኢትዮጵያ ታዳሽ የኢነርጂ ስራዎች ለሁለቱ ሀገራት ግንኙነት ትልቅ መሰረት መሆናቸውን ገልጸዋል። በተለይም የአሴላ የንፋስ ኃይል ማመንጫ ጣቢያ በሁለቱ ሀገራት መካከል ያለውን የትብብር ተምሳሌት መሆኑን አንስተዋል።

ዲፕሎማቱ የኢትዮጵያ የኢነርጂ ዘርፍ መስፋፋት ለሌሎች የአፍሪካ ሀገራት ትልቅ ትምህርት እንደሚሰጥ ተናግረዋል። ዴንማርክ በፖሊሲ አወጣጥ፣ በተቋማት ግንባታ እና በሰው ኃይል ልማት ለኢትዮጵያ የምታደርገውን ድጋፍ እንደምትቀጥል አረጋግጠዋል። ኢትዮጵያ እ.ኤ.አ በ2027 ለምታስተናግደው የCOP32 የአየር ንብረት ጉባኤ ዝግጅት ስትራቴጂያዊ እቅድ አስፈላጊ መሆኑን ጠቁመዋል።