በትምህርት ምዘና አገልግሎት የተደረገው የክፍያ ጭማሪ ተማሪዎችን አሳስቧል

የትምህርት ምዘናና ፈተናዎች አገልግሎት ባወጣው አዲስ የክፍያ ተመን ላይ ተማሪዎች ከፍተኛ ቅሬታቸውን እየገለጹ ነው። እንደ አዲሱ ተመን የዩኒቨርሲቲ መውጫ ፈተና ክፍያ ከ750 ብር ወደ 2,000 ብር ከፍ ብሏል። ተማሪዎችና ተፈታኞች ክፍያዎቹ ለሥራ አጥና ዝቅተኛ ገቢ ላላቸው ተማሪዎችና ቤተሰቦች ትልቅ ጫና መሆናቸውን በመግለጽ፣ ትምህርት የቅንጦት እየሆነ መምጣቱን በመተቸት ላይ ናቸው። ተማሪዎቹ የክፍያ ጭማሪው የትምህርት ዕድልን እንደሚያጠብና ተስፋ አስቆራጭ መሆኑን አንስተዋል። የአገልግሎት መስጫ ተቋሙ ለቀረበው ቅሬታ እስካሁን ምላሽ አልሰጠም።