የእስረኞች አያያዝ ክርክር በሰብዓዊ መብት ኮሚሽን እንዲጣራ ተወሰነ

በቃሊቲ ማረሚያ ቤት የሚገኙት አቶ ዮሐንስ ቧያሌው እና ጋዜጠኛ ዳዊት በጋሻው ስለሚገኙበት የቅጣት ቤት ሁኔታ በጠበቃቸው እና በማረሚያ ቤት ኃላፊው መካከል ክርክር ተነስቷል። የቃሊቲ ማረሚያ ቤት ኃላፊ ኮማንደር ጣሰው ቦታው ለጤና ተስማሚ ነው በማለት ሲከራከሩ፣ ታሳሪዎቹ ግን ቦታው ጠባብ፣ የፀሐይ ብርሃንና መብራት የሌለው እንደሆነ አቤቱታ አቅርበዋል። ፍርድ ቤቱ ጉዳዩ አጨቃጫቂ በመሆኑ የኢትዮጵያ ሰብዓዊ መብት ኮሚሽን ሁኔታውን አጣርቶ ለጥቅምት 13/2019 ዓ.ም ሪፖርት እንዲያቀርብ ቀጠሮ ሰጥቷል። በተጨማሪም ፍርድ ቤቱ ጋዜጠኛ አባይ ዘውዱን፣ አቶ ዮሐንስ ቧያሌውን፣ አቶ ደሳለኝ እጅጉን እና ዶ/ር ዘሪሁን ባህሪውን “ተከላከሉ” በማለት ብይን ሰጥቷል።