የአዲስ አበባ ገቢዎች ቢሮ አዳዲስ የግብር አሰራር መመሪያዎችን ይፋ አደረገ

የአዲስ አበባ ከተማ አስተዳደር ገቢዎች ቢሮ ለ2018 ዓ.ም የግብር አሰባሰብ ሂደትን ለማስተካከል አዲስ የዴስክ ኦዲት መመሪያዎችን ይፋ አድርጓል። አዲሱ መመሪያ በጥሬ ገንዘብ የሚፈጸሙ ግብይቶችን በቀንና በአንድ ሰው እስከ 50 ሺህ ብር ብቻ እንዲገደቡ ወስኗል። ይህን ጣሪያ የሚበልጡ ክፍያዎች በሂሳብ መዝገብ ላይ ወጪ ተደርገው እንደማይቀናነሱና ተመጣጣኝ አስተዳደራዊ መቀጫ እንደሚከተልም ተገልጿል። በሌላ በኩል፣ ኪሳራ ለሚያውጁ ነጋዴዎች ከጠቅላላ ገቢያቸው ላይ 2.5 በመቶ "አማራጭ አነስተኛ ግብር" እንዲከፍሉ የሚገደድ ሲሆን፣ አሳማኝ ማስረጃ ካልቀረበ የግብር መጠኑ በገበያ ዋጋ ጥናት ተነጻጽሮ እንዲስተካከል ይደረጋል። በተጨማሪም የሪል እስቴት አልሚዎች ገቢያቸውን በግንባታ አፈጻጸም ምጣኔ እንዲያሳውቁና የግብዓት ተ.እ.ታ ማቀናነስ የሚችሉት ሽያጭ ሲጀምሩ ብቻ እንዲሆን የሚያዝ ደንብ ተቀምጧል።