Magaalaa Walqixxee keessatti artist Anteneh Tekelku dabalatee namoonni sadii dhukaasaan ajjeefaman

Magaalaa Walqixxee naannoo 'G & P' jedhamuutti dhukaasa halkan kanaan artist Anteneh Tekelku dabalatee namoonni sadii lubbuun darban. Artistichi konkolaataasaa suphaa osoo jiruu dhukaasichi kan isarratti baname yoo ta'u, namoonni biroo lamaan konkolaachisaa konkolaataa fe'umsaa (Isuzu) Dinu Dulaa fi gargaartuu isaa Muraad Wagbaza dha. Reeffi namoota ajjeefamanii qorannoof gara Addis Ababaatti ergamee booda har'a guyyaa gara Walqixxee deebi'eera. Hanga ammaa namni ajjeechaa kana raawwate hin beekamu akkasumas kanneen shakkaman hin jiran. Jiraattonni naannichaa nageenyi naannichaa hammaachaa adeemuusaa fi dhukaasni amaleeffatamuusaa ibsaniiru. Bulchiinsi magaalattii fi hogganoonni komaand postii gaaffii miidiyaaleef deebii kennuu hin dandeenye.