Zoonii Guraagee Bahaa Aanaa Sooddootti Haleellaa Raawwatameen Namoonni Torba Ajjeefaman

Naannoo Itoophiyaa Gidduugaleessaa Zoonii Guraagee Bahaa Aanaa Sooddoo ganda Sutan keessatti hidhattoonni haleellaa tasaa raawwataniin namoonni torba ajjeefamanii namoonni afur fudhatamuu jiraattonni ibsan. Akka jiraattonni gara magaalaa Bu'iitti baqatan jedhanitti, haleellaan kun meeshaa gurguddaadhaan deeggaramuun raawwatame. Namoota ajjeefaman keessaa miseensonni raayyaa ittisaa duraanii fi miiliishoonni ja'a akkasumas qotee bulaan tokko keessatti argamu. Jiraattonni akka jedhanitti, gareen hidhattootaa kun ganda Sutan walakkaa guutuu to'annoo isaanii jala oolchuun suqiiwwan daldalaa saamanii galgala keessa naannichaa ba'aniiru. Naannichatti haleellaan walfakkaataan kanaan duraas raawwatamaa turuu fi uummatni yaaddoo guddaa keessa jiraachuun mootummaan federaalaa gidduu akka galu gaafatanii jiru.