Godina Goondar Kaabaa Aanaa Yedaatti Oonaatiin Beeyladoonni 15,000 Du'an, Ummatni 95,000 Miidhame

Godina Goondar Kaabaa Aanaa Yedaatti sababa hanqina roobaa fi oonaa ulfaataatiin ummata aanichaa 122,000 keessaa 95,500 caalan rakkoo cimaaf saaxilamuun isaanii Waajjira Qonnaa Aanichaan ibsameera. Ganda 22 aanichatti argaman keessaa gandoonni 18 oonaa kanaan kan miidhaman yoo ta'u, lafa qonnaa hektara 17,075 facaafame keessaa hektarri 14,375 ol miidhameera. Guyyoota 50 darban keessatti sababa oonaa kanaan beeyladoonni 15,000 ol kan du'an yoo ta'u, jiraattotni 6,550 ta'an ammoo qeyee isaanii dhiisanii baqataniiru. Hanga yoonaatti lubbuun namaa kan hin darbin ta'us, yoo roobni ariitiin hin roobne rakkoon kun caalaatti hamachuu danda'a jechuun waajjirichi yaaddoo isaa ibseera. Bulchiinsi aanichaa gargaarsa hatattamaa mootummaa naannoo fi godinaa gaafateera.