Zoonii Kamaashitti Dhiibbaa Humnoota Hidhataniin Raawwatameen Namoonni Du'anii Kumaatamaan Buqqa'an

Naannoo Benishaangul Gumuz, Zoonii Kamaashitti Woreda Mishjigaa keessatti ganda Angar Meetii (Ayishaanjidim) irratti humnoota hidhataniin dhiibbaan cimaan raawwatameera. Akka miseensi mana marii naannichaa obbo Lammeessaa Neenoo fi jiraattonni ibsanitti, miidhaa kanaan namoonni lama ajjeefamanii jiraattonni 5,000 ol ta'an buqqa'anii bosona keessatti faca'aniiru. Akkasumas manneen 1,000 ol gubamanii, mana kuusaa midhaanii miidhaan hedduun wajjin kan manca'e yoo ta'u, beeyladoonnis booji'amaniiru. Jiraattonni dhiibbaan kun barana qofaaf yeroo sadaffaaf raawwatamuu ibsuun, humnoonni hidhataan dhiibbaa kana raawwachuu eeraniiru. Aangawaan Koomuniikeeshinii Zoonii Kamaash obbo Boqaa Abosettiis dhiibbaan sun raawwatamuu mirkaneessanii, ammaan tana raayyaan ittisa biyyaa bakka sana galuun uummata faca'e walitti qabaa jiraachuu dubbataniiru.