Naannoo Afaaritti Re'oonni 200 Ol Biqiltuu Summaa'aa Nyaachuun Du'an

Naannoo Afaar Zoonii Kilbatii Rasuu Aanaa Beraahileetti re'oonni 200 ol biqiltuu summaa'aa magariisa "Ru'uraa'ii" jedhamu nyaachuun kan du'an yoo ta'u, 500 kan ta'an immoo miidhamaniiru. Hogganaan Biiroo Komunikeeshinii naannichaa Obbo Mahaammad Alii fi Qajeelcha Eegumsa Fayyaa Beeyladaa Dr. Abduulqaadir Mahaammad akka mirkaneessanitti, du'ti Beeyladoota kanaa dhibee ykn jigsa dhagaa osoo hin taane summii biqiltuu kanaan kan ka'eedha. Biqiltuun kun caama fi ho'a damdamachuu kan danda'u yoo ta'u, kanaan dura sababa kanaan beeyladoonni du'anii kan hin beekne ta'uun ibsameera. Bulchiinsi Aanichaa Obbo Alii Hasaaniin akka jedhanitti, horsiise bultoonni beeylada isaanii biqiltuu kana irraa akka eegatani fi biqilticha akka balleessan dhaamaniiru. Miidhaa dabalataa ittisuuf biqiltuu kana irratti qorannoon dabalataa kan taasifamu ta'uun eerameera.