የአዲስ አበባ ገቢዎች ቢሮ በመኪና ንግድ ላይ ቁጥጥር አጠናከረ

የአዲስ አበባ ገቢዎች ቢሮ በመኪና አስመጪዎች እና ሻጮች ላይ የታክስ ስወራን ለመከላከል ጥብቅ የቁጥጥር እርምጃዎችን መውሰድ መጀመሩን አስታወቀ። የቢሮው የሕግ ተገዢነት ዘርፍ ምክትል ኃላፊ አቶ መሐመድ አብዱራህማን እንደገለጹት፣ አዳዲስ መኪኖች ሊሸጡ የሚችሉት አስመጪው ፈቃድ ባወጣበት ቦታ ብቻ ሲሆን፣ የኮሚሽን ኤጀንቶች አዲስ መኪና የመሸጥ መብት እንደሌላቸው ተመልክቷል። ያገለገሉ መኪና የሚሸጡ ኤጀንቶችም ተሽከርካሪዎችን በ24 ሰዓት ውስጥ ለታክስ ባለስልጣን የማሳወቅ ግዴታ ተጥሎባቸዋል። ቢሮው አስመጪዎች ዋጋን ዝቅ አድርገው በመግለጽ እና መኪኖችን በሕገ-ወጥ መጋዘኖች በመደበቅ ከፍተኛ የታክስ ማጭበርበር ሲፈጽሙ እንደደረሰበት ገልጿል። በዚህም ምክንያት የሕግ ጥሰት የፈጸሙ የኮሚሽን ኤጀንቶች ፈቃድ የታገደ ሲሆን፣ በየመጋዘኑ እና በየቤቱ የሚደረጉ ፍተሻዎች ተጠናክረው እንደሚቀጥሉ ተሰምቷል።