Wallegga Dhihaatti Konkolaattoonni Boba'aa Gubaman, Ooftonni 8 Ol Qabataman

Naannoo Oromiyaa Godina Wallegga Dhihaatti Qaammee 1, 2018 A.L.I maleeyyikkeen meeshaa waraanaa baataniin konkolaattoota boba'aa geessisan irratti haleellaa raawwatameen konkolaattoonni hedduun gubamanii ooftonni hedduun fudhatamaniiru. Akka Hojii Geggeessaan Walda Oofiisaa Konkolaataa Cimaa Itoophiyaa Obbo Solomoon Zawuduu jedhanitti, konkolaattoonni Dambii Doolloo irraa gara Asosaatti imalaa turan haleelamanii ooftonni 8 ol fudhatamuu fi konkolaataan 9 ta'an gubachuu ibsaniiru. Dhaabbanni 'Sagalee Oofitootaa' jedhamu gama isaatiin immoo oofthonni qabataman 14 gahuu fi haleellaan kun Giimbiif Biilaa giddutti raawwatamuu eerera. Qondaaltota naannichaa fi Poolisii Federaalaa dubbisuuf yaaliin godhame hin milkaawne. Waldaan Oofitoota Cimaa haleellaa kana balaaleffachuudhaan ooftonni meeshaalee bu'uuraa kan akka boba'aa, qorichaa fi nyaata uummataaf kan dhiyeessan ta'uu ibsee haleellaa isaaniirratti raawwatamu akka dhaabatu gaafateera. Akka odeeffannoo dhaabbata 'Sagalee Oofitootaa'tti bara 2017 A.L.I keessatti ooftonni, gargaartonni fi imaltoonni 116 ajjeefamanii 608 immoo fudhatamaniiru.