Qabxiin darbii barnoota 'Remedial' ifoome

Ministeerri Barnoota qabxii seensa yuunivarsitii sagantaa 'Remedial' bara 2019 ifoomeera. Murteen kun bu'aa barattootaa, dandeettii simannaa yuunivarsitiiwwanii fi qixxee ta'uu barnootaa irratti kan hundaa'eedha.

Barattoota dhiiraatiif qabxiin darbii 240 (40%) yoo ta'u, barattoota dubaraatiif ammoo 228 (38%) ta'ee murtaa'eera. Naannolee guddatanii fi horsiisee bulaa akkasumas barattoota gargaarsa addaa barbaadaniif qabxiin kun 222 (37%) ta'eera. Barattoonni qaama miidhamoo ta'an (ijaa) barnoota saayinsii hawaasaatiin 185 (37%) fiduun darbuu danda'u.