Aanaa Abeshgee Keessatti Namoonni 17 Ajjeefamuun 10 Ol Butamuu Jiraattonni fi Qondaaltonni IbSan

Naannoo Itoophiyaa Gidduugaleessaa Godina Guraagee Aanaa Abeshgee iddoo Walgaa jedhamutti miidhaa raawwatameen namoonni 17 ajjeefamanii 10 ol akka butaman maddeen nannoo ibsaniiru. Jiraattonni akka jedhanitti waqti gannaatii jalqabee miidhaan kun kan hammaate yoo ta'u, namoonni hedduun qe'ee isaanii irraa buqqa'aa jiru. Akka maddeen kun jedhanitti namoota butamaniif hanga ammaatti qarshiin miliyoona 34 ol kaffalamuu isaati mirkanaa'eera. Poolisiin Godina Guraagee miidhaan raawwatamuu mirkaneessus, odeeffannoo dabalataa kennuuf gara Komaand Poostii naannichaatti qajeelcheera. Hoogganaan Biiroo Nageenyaa fi Tasgabbii Naannichaa Obbo Temesgeen Kaasaa miidhaa kana mirkaneessuudhaan, humna ofiin "Faanoo" jedhee waamu yakkaniiru. Humnoonni nageenyaa mootummaa tasgabbii deebisuuf jecha naannichatti socho'aa akka jiran ibsameera.