Ityoophiyaan Ogeeyyii Sammuu Kumaan Lakkaa'aman Akka Barbaachisu Pirofeesarsi Atalaay Ibse

Waldaan Ogeeyyii Sammuu Ityoophiyaa Yaa'ii Isaa 13ffaa mata duree teeknoolojii Artificial Intelligence (AI) fayyadamuun tajaajila fayyaa sammuu dhaqqabamaa fi qulqullina qabu gochuu jedhuun geggeessera. Pirezidaantiin waldaichaa Pirofeeser Atalaay Alam akka ibsanitti, waggoota 20n darban keessatti lakkoofsi ogeeyyii sammuu 9 irraa gara 240tti kan guddate yoo ta'u, tajaajilchis kutaalee biyyaa hundaatti babal'ateera. Ta'us, ulaagaa Dhaabbata Fayyaa Addunyaa (WHO) tiin yoo ilaalamu biyyattiin ogeeyyii sammuu kumaan lakkaa'aman caalaatti ni barbaaddi. Qaqqabamtummaa tajaajila kanaa caalaatti dabaluuf, keessattuu baadiyyaa keessatti, teeknoolojii AI fi mobaayila fayyadamuuf qorannoon geggeeffamaa jira. Waldaichi Ministeera Fayyaa waliin ta'uun karoora tarsiimoo fayyaa sammuu waggaa shanii qopheessaa kan jiru yoo ta'u, miidhaa miidiyaan hawaasaa dargaggoota irraan gahaa jirus akeekkachiiseera.