Dorgommiin Morkii Ispoortii Sirna To'annoo Haaraatiin Deebi'ee Jalqabamuufi

Tajaajilli Lotorii Itoophiyaa sochiin morkii ispoortii sirna to'annoo fi teeknoolojii haaraa qophaa'een booda deebi'ee akka jalqabamu beeksiseera. Hoogganaan Tajaajilichaa adde Beezaa Girmaa akka ibsanitti, hojiin morkii ispoortii dhaabbachuun isaa fooyyessaa seeraa fi to'annoo cimaa diriirsuuf yaadameeti. Gabaasa ooditii duraa irratti hundaa'uudhaan, dhaabbileen morkii ispoortii qarshii biliyoona 199 sochoosuun komishinii qarshii biliyoona 30 kaffaluu kan qaban ta'us, qarshii biliyoona 3.6 qofa kaffalaniiru. Kanaanis galii mootummaa qarshii biliyoona 27.5 hin sassaabamiin hafeera; kan keessaas qarshiin biliyoona 8.64 liqaa dhaabbata "Dashbet" jedhamu irra jiruudha. Tajaajilichi gabaasni ooditii inni dhumaa erga mirkanaa'ee booda tarkaanfiin seeraa kan fudhatamu ta'uu beeksiseera. Dhiyeenyas dhaabbanni kun uummatni bakkeewwan morkii seeraan ala ta'an irratti akka hin hirmaanne fi dhimma kana irratti qaamolee nageenyaa fi teeknoolojii waliin qindoominaan hojjechaa jiraachuu beeksiseera.