Ministeerri Barnootaa simannaa, ramaddii fi jijjiijraa barattoota yuunivarsiitii irratti qajeelfama baase

Ministeerri Barnootaa Itoophiyaa simannaa barattootaa, ramaddii gosoota barnootaa fi jijjiirraa Yuunivarsiitiiwwan mootummaa keessatti raawwatamu haala ifa fi haqa-qabeessa ta'een qajeelfama haaraa baaseera. Akka qajeelfama kanaatti, yuunivarsiitiwwan barattoota Ministeera Barnootaatiin ramadaman qofa simachuu kan qaban yoo ta'u, hayyama malee barattoota dabalataa simachuunis ta'e jijjiirraa taasisuun dhorgaadha. Ramaddii muummee barnootaatiif qabxiin semisteera jalqabaa, qabxiin qormaata kutaa 12ffaa, filannoon barataa fi dandeettiin simannaa dhaabbataa madaallii keessa kan galan ta'a. Dabalataanis, deeggarsa addaatiin barattoota dubaraa fi qaama miidhamtootaaf qabxiin 5 dabalataan kan qabamuuf ta'a. Jijjiirraan yuunivarsiitii kan hayyamamu barataan tokko yoo xiqqaate semisteera tokko baratee, qabxii giddu-galeessaa (GPA) 2.00 fi isaa ol yoo qabaate dabalataanis balleessaa naamusaa malee yoo ta'e qofaadha. Jijjiirraan dhaabbata dhuunfaa irraa gara yuunivarsiitii mootummaatti taasifamu kan dhorkame yoo ta'u, yuunivarsiitii mootummaa irraa gara dhuunfaatti garuu kan hayyamamudha.