Kantiibaan Magaalaa Matahaaraa Obbo Addisuu Waaqoo fi Oofkaan Saanii Balaa Konkolaataatiin Du'an

Kantiibaan magaalaa Matahaaraa Godina Shawaa Bahaa Naannoo Oromiyaa Obbo Addisuu Waaqoo fi oofkaan isaanii balaa konkolaataatiin lubbuun isaanii darbuun gabaafame. Akka odeeffannoon qeerroo fi komaand poostii irraa argame agarsiisutti, balaan kun kan qaqqabe Pagume 3 bakka 'Ilaalaa' jedhamu magaalaa Matahaaraa irraa kilomeetira 5 hin guunne irratti. Oofkaan konkolaatichaa guyyuma balaan sun qaqqabetti battalatti lubbuun isaa darbeera. Kantiibaa Addisuu Waaqoo miidhaa cimaa irra gaheen Ospitaala Ito-Istaambullitti yaalamaa turanii guyyaa har'aa addunyaa kana irraa boqotaniiru. Hoogganaan Biiroo Komanikeeshinii Naannoo Oromiyaa Obbo Haayiluu Adunyaa oduu kana Tikhvaah Itoophiyaaf mirkassaniiru. Balaan kun konkolaataa botteedhaan walitti bu'iinsa uumameen kan qaqqabe ta'uun ibsameera.