Ministeerri Barnootaa Qajeelfama Guddina Sadarkaa Barsiisotaa Haaraa Baase

Ministeerri Barnootaa qajeelfama raawwii guddina sadarkaa barsiisota barnoota waliigalaa lakk. 1148/2018 mana barnoota mootummaa daa'immanii hanga sadarkaa 2ffaatti jiraniif oolu dhiyeesseera. Labsii Barnoota Waliigalaa lakk. 1368/2017 irratti hundaa'uun qajeelfamni kun gulantaa guddina barsiisotaa sadarkaa torbatti kan qoodu yoo ta'u, barsiisaa jalqabaa irraa kaasee hanga barsiisaa dursaa ol'aanaatti kan hammatuudha. Sadarkaa jalqabaa irraa gara sadarkaa itti aanutti cehuuf waggaa 2, sadarkaalee itti aananiif immoo turtee waggaa 3 kan gaafatuudha. Barsiisoonni guddina sadarkaaf dorgomtoota ta'uuf eeyyama ogummaa kan qaban ta'uu, leenjii gaggabaabaa fudhatanii CPD raawwachuu fi barattoota barsiisan keessaa dhibbeentaa 75 kan ta'an qabxii 50% fi isaa ol fiduu isaanii qaama walabaatiin mirkanaa'uu qaba. Qajeelfamichi barsiisota barattoonni isaanii walitti aansuun waggoota dhiyootti qabxii ol'aanaa 85% fi 90% fidan qabaniif guddina sadarkaa ariifachiisaa fi daballii mindaa kan kennuudha. Raawwiin guddina sadarkaa kun waggaatti al lama Amajjii 1 fi Waxabajjii 1 kan raawwatamu ta'ee, komiin yoo jiraate guyyoota hojii 10 keessatti dhiyaachuu danda'a.