Tigraay Shirraaroo fi Adwaatti haleellaa doroniitiin hawaasni namoota buqqa'an dabalatee ajjeefaman

Sanbata galgala naannoo Tigraay Godina Kaaba Lixa Shirraaroo fi Godina Ciddagaleessaa Adwaatti haleellaa doronii adda addaatiin hawaasni ajjeefamuu fi madaa'uu jiraattonni fi ijaan argitoonni ibsan. Shirraarootti kaampii namoota qe'ee isaanii irraa buqqa'anii irratti haleellaa sa'aatii 8:15 irratti raawwatameen namoonni sagal ajjeefamanii 14 madaa'aniiru. Haleellaan kun bakka Adii Abaay jedhamu kan namoonni Dhiha Tigraay irraa buqqa'an keessa qubatanii jiran irratti raawwatame. Ijaan kan arge tokko akka ibsetti, haadha daa'ima guyyoota muraasa deessuu dabalatee namoonni hedduun haala suukanneessaan ajjeefamaniiru. Gama biraatiin, magaalaa Adwaa keessatti bakkeewwan adda addaa irratti haleellaa doronii raawwatameen namoonni nagaa hedduun ajjeefamuu jiraattonni eeranis, lakkoofsa namoota miidhamanii qorannoo walabaatiin mirkaneessuun hin danda'amne.