ከሞያሌ ግጭት የተፈናቀሉ ዜጎች አስቸኳይ እርዳታ ጠየቁ

በኦሮሚያ እና በሶማሌ ክልሎች መካከል በተፈጠረ የግዛት እና የአስተዳደር አለመግባባት ምክንያት ከሞያሌ የተፈናቀሉ ዜጎች አስቸኳይ የሰብአዊ እርዳታ ጠየቁ። ከጥቅምት 12 ቀን 2017 ዓ.ም ጀምሮ በተቀሰቀሰው የጦር መሳሪያ ግጭት ቤቶች እና ንብረቶች መውደማቸው የተነገረ ሲሆን፣ በሺዎች የሚቆጠሩ ሰዎች ወደ ኬንያ ድንበር ተሻግረዋል። ተፈናቃዮች እንደገለጹት እስካሁን ወደ 10,000 የሚጠጉ ሰዎች ተፈናቅለዋል፤ አብዛኞቹም ሴቶች እና ህጻናት ናቸው። እነዚህ ወገኖች መጠለያ፣ ምግብ እና ሌሎች መሰረታዊ ፍላጎቶችን ለማሟላት በመቸገራቸው መንግስታዊ እና ሰብአዊ ተቋማት ጣልቃ እንዲገቡ ጥሪ አቅርበዋል። ግጭቱ አሁንም የቀጠለ ሲሆን፣ በሰው ህይወት ላይ የደረሰ ጉዳት መኖሩም ተዘግቧል።