Mana Maree Qulqullootaa Itoophiyaa namoonni 60 Oromiyaa keessatti ajjeefamuu mirkaneesse

Mana Maree Qulqullootaa (Holy Synod) Waldaa Ortodoksii Itoophiyaa haleellaa naannoo Oromiyaatti raawwatameen amantoonni 60 ajjeefamuu isaanii mirkaneesseera. Mana mareen kun ajjeechaawwan kunneen "daangaa darbe" jechuun ibsee, naannoo Arsii fi kutaa biyyattii biroo keessatti namoota Ortodoksii ta'an irratti ajjeechaan, buqqaatiin fi qabeenya barbadeessuun daran dabalaa dhufeera jedheera. Qaamoleen mootummaa ajjeechaa kana ifatti akka balaaleeffatan, namoota nagaa akka eegan fi yakka kana raawwatan seeratti akka dhiyeessan gaafateera.