የአሜሪካ የውጭ ግንኙነት ኮሚቴ በኦሮሚያ ክልል በተፈጸመ ጥቃት ቅሬታውን ገለጸ

የአሜሪካ የተወካዮች ምክር ቤት የውጭ ግንኙነት ኮሚቴ በኦሮሚያ ክልል በኦርቶዶክስ ክርስቲያኖች ላይ የተፈጸሙ ጥቃቶችን አወገዘ። ኮሚቴው ጥቃቶቹን "ሙሉ በሙሉ ተቀባይነት የሌላቸው" ሲል በመግለጽ፣ ሁሉም ወገኖች የሃይማኖት ተቋማትንና ምዕመናንን ከጥቃት እንዲከላከሉ እንዲሁም ተጠያቂዎች ለፍርድ እንዲቀርቡ አሳስቧል።

ይህ በእንዲህ እንዳለ የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ጥቅምት 16 ቀን በሰጠው መግለጫ፣ በጥቅምት 10 ቀን በመርቲ ወረዳ (አንጋዳ ቀበሌ) 14 ሰዎች፣ እንዲሁም በጥቅምት 14 ቀን በሽርካ ወረዳ (ተሬታ፣ ቾሌ እና ቢርቦ) 46 ሰዎች መገደላቸውን አስታውቋል። ቅዱስ ሲኖዶሱ ግድያዎቹን "እጅግ አሳዛኝ እና ዘግናኝ ሰቆቃ" ሲል ገልጿቸዋል።