ኮሚቴ ጉዳያት ወጻኢ ኣመሪካ ኣብ ክልል ኦሮሚያ ዝተፈጸመ መጥቃዕቲ ኮኒኑ

ኮሚቴ ጉዳያት ወጻኢ ባይቶ ወከልቲ ኣመሪካ ኣብ ክልል ኦሮሚያ ኣብ ልዕሊ ሰዓብቲ ሃይማኖት ኦርቶዶክስ ዝተፈጸመ መጥቃዕቲ ኮኒኑ። እቲ ኮሚቴ ነቲ መጥቃዕቲ "ብፍጹም ተቐባልነት ዘይብሉ" ብምባል፣ ኩሎም ወገናት ሰዓብቲ ኩለን ሃይማኖታት ካብ መጥቃዕቲ ክከላኸሉን፣ ተሓተትቲ ድማ ንፍርዲ ክቐርቡን ኣተሓሳሲቡ።

ብኻልእ ወገን፣ ቅዱስ ሲኖዶስ ቤተ ክርስትያን ኦርቶዶክስ ተዋህዶ ኢትዮጵያ ኣብ ዘውጸኦ መግለጺ፣ ኣብ ዕለት 16 ጥቅምቲ ኣብ ወረዳ መርቲ (ቀበሌ አንጋዳ) 14 ሰባት፣ ከምኡውን ኣብ ዕለት 14 ጥቅምቲ ኣብ ወረዳ ሽርካ (ተሬታ፣ ቾሌን ቢርቦን) 46 ሰባት ከምዝተቐትሉ ኣፍሊጡ። ቅዱስ ሲኖዶስ ነቲ ቅትለት "ኣዝዩ ዘሕዝን ጭካነ" ክብል ገሊጽዎ።