በራማ ከተማ በተፈፀመ የድሮን ጥቃት ቢያንስ 12 ሰዎች ተገደሉ

በማዕከላዊ ትግራይ ዞን በራማ ከተማ ለሦስት ተከታታይ ቀናት በተፈፀመ የድሮን ጥቃት ቢያንስ 12 ሰዎች መገደላቸውን የዓይን እማኞችና የሆስፒታል ምንጮች ለቢቢሲ ተናገሩ። ጥቃቱ በተለይም አርብ ዕለት የደረሰ ሲሆን፣ በወቅቱ ተሽከርካሪ ላይ የነበረውን እህል ሲያራግፉ የነበሩ ወጣቶች ላይ ያነጣጠረ ነበር። ነዋሪዎች እንደገለፁት፣ ጥቃቱ በተፈፀመበት አካባቢ ምንም ዓይነት የጦር እንቅስቃሴ አልነበረም፤ ተጎጂዎቹም ሰላማዊ ዜጎች ናቸው። ከዚህ ቀደም ረቡዕ እና ሐሙስ በተፈፀሙ ተመሳሳይ ጥቃቶችም ሌሎች ሰዎች ሕይወታቸውን ማጣታቸው ተገልጿል። የፌዴራል መንግሥት እስካሁን ስለ ጥቃቱ የሰጠው ምላሽ የለም።