ኣብ ከተማ ራማ ብዝተፈጸመ መጥቃዕቲ ድሮን እንተወሓደ 12 ሰባት ተቐቲሎም

ኣብ ማእከላይ ዞባ ትግራይ ኣብ ከተማ ራማ ንሰለስተ ተኸታታሊ መዓልታት ብዝተፈጸመ መጥቃዕቲ ድሮን እንተወሓደ 12 ሰባት ከምዝተቐትሉ መሰኻኽር ዓይኒን ምንጭታት ሆስፒታልን ንቢቢሲ ገሊጾም። እቲ መጥቃዕቲ ብፍላይ ዓርቢ ኣብ ዝነበረ እዋን፣ ካብ ተሽከርካሪ እኽሊ ኣብ ምውራድ ዝነበሩ መንእሰያት ዘነጣጠረ እዩ ነይሩ። ነበርቲ ከምዝገለጽዎ፣ እቲ መጥቃዕቲ ኣብ ዝተፈጸመሉ ቦታ ዝኾነ ይኹን ምንቅስቓስ ወተሃደራት ኣይነበረን፤ ግዳያት እውን ንጹሃን ዜጋታት እዮም። ቅድሚ ሕጂ ረቡዕን ሓሙስን ኣብ ዝተፈጸሙ ተመሳሰልቲ መጥቃዕቲታት እውን ካልኦት ሰባት ሂወቶም ከምዝሰኣኑ ተገሊጹ ኣሎ። መንግስቲ ፌደራል ብዛዕባ እቲ መጥቃዕቲ ክሳብ ሕጂ ዝሃቦ ምላሽ የለን።