Filannoo Israa'el: Netaaniyaahuun paartilee Arabaa irratti himannaa giddu seentummaa alaa dhiyeessan

Mummichi ministeeraa Israa'el duraanii Beeniyaamiin Netaaniyaahuu, paartileen Arabaa filannoo Israa'el irratti hirmaatan biyyoota akka Turkiifi Kaataar irraa fandii fudhachuun sagalee hatan jechuun himatan. Morkataan isaanii Gaadii Ayizaankootifi paartileen Arabaa himannaa kana 'soba' fi bu'aa filannichaa gatii dhabsiisuuf kan dhiyaate jechuun komatan. Mootummaan Kaataar himannaa kana 'himannaa dhugaarraa fagaate' jechuun balaaleffateera.

Waajjirri tika biyya keessaa Israa'el (Shiin Beet) dhimicha qorachaa jiruus, himannaa hawaasa Arabaa guutummaarratti dhiyaate kana sirrii akka hin taane ibseera. Paartileen Arabaa teessuma 19 paarlaamaa keessatti argachuun isaanii mootummaa ijaaruu irratti gahee murteessaa akka qabaatan taasiseera. Paartiin Netaaniyaahuu Likuud teessuma 53 yoo argatu, gamtaan morkattootaa ammoo teessuma 48 argataniiru. Morkattoonni Netaaniyaahuu inni duula sobaa gaggeessaa jiraachuun himatu.