Bilisummaa Dinagdee Afrikaa fi Pirojeektoota Misoomaa Itoophiyaa

Biliyoonaarri Afrikaa Aliikoo Daangotee, biyyoonni Afrikaa albuuda isaanii dheedhii gabaa biyya alaatti erguu dhiisanii, biyyuma keessatti oomishuun dinagdee isaanii cimsuu akka qaban gorsa kennan. Daangotee, lammiileen Afrikaa guddina ardichaaf biyyoota alaa irratti hirkachuu irra, ofuma isaaniif irratti hojjechuu qabu jedhan. Itoophiyaa keessatti pirojeektoota gurguddoo irratti bobba'uun, warshaa xaa'oo fi ujuummoo daddabarsa boba'aa Itoophiyaa fi Jibuutii wal qunnamsiisu doolaara miiliyoona 660 ol baasu ijaaraa jiru. Ministirri Muummee Itoophiyaa Abiy Ahimed ujuummoon kun dhiyeessii boba'aa buufata doonii Jibuutii irraa hanga Finfinneetti guyyaa shan fudhachaa ture gara guyyaa tokkootti akka xiqqeessu ibsaniiru. Itoophiyaan warshaa qulqulleessa warqii doolaara miiliyoona 50 oliin ijaaruun gatii dabaltee gabaa addunyaaf dhiyeessuuf karoorfateetti. Dr. Maarit Qixaaw gorsituun Komishinii Dinagdee Afrikaa, jijjiiramni kun imaammata 'Africa Mining Vision' bara 2009 eegale waliin kan deemu tahuu ibsan. Jijjiiramni kunis gaaffii dargaggoonni carraa hojii fi guddina dinagdee irratti kaasan haalaan dabaluu isaatiin kan dhufe tahuu ibsameera.