Walitti bu'iinsa Mooyyaleen namoonni kumaatamaan lakkaa'aman gara Keeniyaatti baqatan

Walitti bu'iinsa naannoo Mooyyaleetti dhalateen namoonni kuma kudhan ol ta'an buqqa'anii gara daangaa Keeniyaatti baqachuu isaanii Dhaabbanni Fannoo Diimaa Keeniyaa beeksisera. Namoonni buqqa'an kun manneen barnootaa, masjiidota fi waldaalee amantaa akkasumas mana dhuunfaa keessa qubataa jiru. Gargaarsi nyaataa fi fayyaa kan hin jirre ta'uu fi rakkoon kun gara naannoolee biroo kan akka Guchii fi Areerootti babal'achaa jiraachuu jiraattoonni himaniiru. Kantiibaan magaalaa Mooyyale Obbo Galmaa Korofichaa, walitti bu'iinsa kana hatattamaan mootummaan akka hiiku gaafatanii jiru. Mootummaan federaalaa hanga yoonaatti waa'ee walitti bu'iinsichaa ifatti wanti jedhe hin jiru.