Walitti bu'iinsi Mooyyalee itti fufeen namoonni kumaatamaan lakkaa'aman gara Keeniyaatti baqatan

Walitti bu'iinsi magaalattii Mooyyalee keessatti jalqabe guyyaa fi halkan itti fufee akka jiru jiraattonni ibsaniiru. Dhaabbanni Fannoo Diimaa Keeniyaa akka jedhetti, namoonni kumaatamaan lakkaa'aman rakkoo nageenyaa kana irraa baqachuun gara Keeniyaatti cehaniiru. Nama 8,700 ol ta'antu kaampiiwwan qophaa'an keessa kan qubatan yoo ta'u, dhibbeentaa 95 kan ta'an immoo manaa namoota dhuunfaatti da'ataniiru. Namoonni buqqa'an kun nyaata, bishaan dhugaatii fi iddoo bultii akka dhaban himanii gargaarsa hatattamaa gaafataniiru. Kantiibaan magaalaa Mooyyalee, Obbo Galmaa Korophichaa, walitti bu'iinsichi dhimma daangaa irratti kan hundaa'e ta'uu himanii, humnoota naannoo Somaalee irratti komii dhiheessaniiru.