Shaashamanneetti dubartiin daa'ima baatii ja'aa ajjeeste hidhaa waggaa 25n adabamte

Manni Murtii Olaanaa Magaalaa Shaashamannee dubartii Hiwot Daani'eel jedhamtu kan mana maatii miidhamaatti hojjettuu turte daa'ima umrii baatii ja'aa Naa'ol Dammasaa jedhamu ukkaamsitee ajjeesuusheetiin hidhaa cimaa waggaa 25n adabeera. Abbaan Alangaa Itti Aanaa magaalaa Shaashamannee Obbo Waariyoo Qaasoo taateen kun kutaa magaalaa Haroofa aanaa Haleeluu iddoo Birhaan jedhamutti mudachuu ibsan. Dubartiin kun mormii ofii jalatti uffataan ukkaamsitee daa'imicha kan ajjeeste yoo ta'u, jalqaba irratti "ooboolessa koo/jaalallee koo waliin bilbilaan haasa'aa osoon jiru akka sagaleen daa'imichaa haadhaaf hin dhagahamneefan ukkaamse" jettee jecha kennitee turte. Garuu qorannoo dhaabbata Itiyoo Telekoom waliin gaggeeffameen sa'aatii sanatti bilbilli haasa'ame kan hin jirre ta'uun mirkanaa'eera. Abbaan Alangaa Dhimma Dubartootaa fi Daa'immanii Aadde Baliyyuu Yooseef akka ibsanitti, maatiin jalqaba irratti shakkii kan hin qabne ta'us, torban tokko booda waan shakkaniif poolisitti iyyatanii reenfi ba'ee qorannoon foorensikii gaggeeffameera. Qorannoon foorensikii daa'imichi ukkaamamee du'uusaa fi yakki kunis beekaati kan raawwatame ta'uu mirkaneessuun adabbiin kun irratti murtaa'eera.