Afrikaa Kibbaatti namoonni 200 ol cancalaan hidhamanii argaman

Poolisiin Afrikaa Kibbaa wiirtuu wallaansaa seeraan alaa konyaa Mpumalaangaa keessatti argamu sakatta’ee namoota 200 ol ta’an bilisa baaseera. Poolisiin wiirtuu kana keessatti namoota cancalaan hidhamanii fi midhaa qaamaa hamaa irra ga’e argateera. Abbaan warraa fi haati warraa wiirtuu kana bulchan yakka nama butuudhaan to’atamaniiru. Wiirtuun kun namoota irraa ji’atti raandii 3,000 kan kaffalchiisu yoo ta’u, namoonni 14 gara hospitaalaatti ergamaniiru, 132 ammoo maatii isaanii waliin walitti makamaniiru. Shakkamtoonni kunneen Wixata mana murtiitti dhiyaatu jedhamee eegama.