Moyaleetti walitti bu'iinsa dhalateen namoonni kumaatama ol qe'eerraa buqqa'an

Dhaabbanni Biyyoota Gamtoomanii akka beeksiseetti, walitti bu'iinsa magaalaa Mooyyaleetti uumameen namoonni kuma 50 ol gara Keeniyaatti baqatan. Walitti bu'iinsi kuni kan eegale alaabaa dhaabuun wal qabatee lubbuun namootaa darbuun isaa kan yaadatamudha. Bulchiinsi Mooyyalee gama Oromiyaafi gama naannoo Somaalee giddutti wal himannaan kan jiru yoo ta'u, mootummaan federaalaa hanga yoonaa ibsa hin kennine. Miseensonni parlaamaa Keeniyaa baqattoonni kunneen magaalaa Mooyyalee Keeniyaa irratti dhiibbaa uumuusaa ibsuun, deeggarsi namoomaa hatattamaan akka barbaachisu gaafataniiru. Gama biraatiin, namoonni Itoophiyaa magaalaa Booramaa (Somaliland) jiraatan haleellaa isaan irra gahaa jiruun sodaa keessa jiraachuu dubbataniiru; dhimmi kunis miseensota parlaamaa Somaaliyaa biratti balaaleeffatameera.