በሞያሌ የድንበር ግጭት ከ50 ሺህ በላይ ሰዎች ተፈናቀሉ

በኢትዮጵያና በኬንያ ድንበር በምትገኘው ሞያሌ ከተማ በተቀሰቀሰ ግጭት ከ50 ሺህ በላይ ሰዎች ወደ ኬንያ መፈናቀላቸውን የተባበሩት መንግሥታት ድርጅት አስታወቀ። ግጭቱ የጀመረው በኦሮሚያና በሶማሌ ክልል አስተዳደር በሚከራከሩበት አካባቢ ባንዲራ ከመስቀል ጋር በተያያዘ በተፈጠረ አለመግባባት ሲሆን፣ እስካሁን የሰው ህይወት መጥፋቱ ተዘግቧል። የሞያሌ የኦሮሚያ አስተዳደር አመራሮች የሶማሌ ክልል ኃይሎችን ሲከሱ፣ የሶማሌው ወገን ክሱ አግባብ አይደለም ሲል ይቃወማል። የፌዴራል መንግሥት እስካሁን በግጭቱ ላይ ምንም ዓይነት መግለጫ አልሰጠም። የኬንያ ፓርላማ አባላት የስደተኞች ቁጥር መጨመር በኬንያ በኩል ያለውን የሞያሌ ከተማ ጫና ውስጥ እንደጣለው በመግለጽ ፈጣን የሰብአዊ ድጋፍ ጠይቀዋል። በተመሳሳይ በሶማሌላንድ ቦረማ ከተማ በሚኖሩ ኢትዮጵያውያን ላይ ጥቃት እየደረሰ መሆኑ ተሰምቷል።