Godina Beench Shakkootti shamarreen ganna 23 haala suukaneessaan ajjeefamte

Massalach Kaashintee, shamarreen ganna 23, Godina Beench Shakkootti gajamoodhaan haala suukaneessaan ajjeefamte. Ajjeechaan kun kan raawwatame guyyaa lama booda sirni ebbishee akka ta'u qophiirra jirtuudha. Namni ajjeechaasheen shakkame Fiqaaduu Gishinaar yoo ta'u, kanaan dura ishee humnaan butee ture. Dhimmi kun gara mana murtii dhaquus, jaarsoliin gidduu seenanii beenyaa kaffalchiisanii himannicha akka addaan citu godhaniiru. Dhaabbileen mirga dubartootaa ibsaniin, beenyaa kaffaluun kun shakkamaan sun 'beenyaa kaffaleera, haadha warraasaati' jechuun ishee doorsisuu akka itti fufuufi boodarras ajjeechaa kana akka raawwatu humna kenneef jedhaniiru. Waajjirri Haqaa Godinichaa shakkamaan kun mana murtii dhiyaachuu mirkaneesseera.