Afrikaa Kibbaa: Dhiironni Haleellaa fi Ajjeechaa Dubartoota Irra Gahu Loluuf Walitti Qabaman

Afrikaa Kibbaa keessatti haleellaa fi ajjeechaa dubartoota irratti raawwatamu haalaan hammaachaa dhufuu hordofee, dhiironni rakkoo kana loluuf walitti qabamaa jiru. Magaalaa Johaannesbarg keessatti waldaan tola ooltummaa 'Father A Nation' jedhamu dhiirota walitti qabuun waa'ee dhiirummaa gaarii fi miidhaa dubartoota irra gahu hambisuu irratti marichisaa jira. Marii kana irratti dhiironni waan kana dura raawwatan ifatti dubbachuun itti gaafatamummaa akka fudhatan godhamaa jira. Qorannoon akka agarsiisutti baatii sadii qofa keessatti reeffi dubartoota 12 magaalaa Ekurhuleni keessatti argamuun ammas muffii guddaa uumee jira. Akka ragaa Komishinii Mirga Namoomaa Afrikaa Kibbaatti, bara kana Ebla hanga Waxabajjii qofa namoonni 5,427 ajjeefamaniiru; isaan keessaa dubartoonni 569 kan ajjeefaman yoo ta'u, kunis guyyaatti dubartoota jaha jechuudha. Dhaabbanni Human Sciences Research Council bara 2022 akka gabaasetti dubartoonni %35 ol haleellaa qaamaa ykn saalaa kan isaan mudatuudha. Pireezidaantiin Afrikaa Kibbaa Siiriil Raamaafoosaa tarkaanfiiwwan fooyya'iinsa ibsaa daandii dabalatu beeksisanis, qindeessitoonni hawaasaa tarkaanfiin kun barfataa fi xiqqaa dha jechuun dhiironni mataan isaaniitiin gocha kana dhaabsisuuf qooda fudhachuu akka qaban dhaamaniiru.