Raashiyaan gidduu gala Itoophiyaa fi Eertraa ta'uuf qophii ta'uu ishee ibsite

Itti aanaan ministeera dhimma alaa Raashiyaa Aleksaandar Aliimov, yaa'ii Raashiyaa-Afrikaa dhufuuf jiru irratti biyyoota lamaan gidduutti waldhabdee jiru furuuf Raashiyaan gidduu gala ta'uuf qophii ta'uu ishee ibsan. Aliimov biyyoota lamaanuu michoota Raashiyaa amanaman jedhanii, rakkoolee isaanii mariin furuuf akka yaalan gaafataniiru. Muummee ministeeraa Abiy Ahmed fi prezidaantiin Eertraa Isaayaas Afawarqi yaa'ii Moskoo irratti akka hirmaatan eegama. Tattaaffiin diplomasi kun kan godhamu walitti dhufeenyi biyyoota lamaanii sababa waraana Kaaba Itoophiyaatiin gara waldhabdeetti erga seenanii booda. Ministeerota dhimma alaa Itoophiyaa fi Eertraan yaada isaanii gara Mana Maree Nageenyaa Dhaabbata Mootummoota Gamtoomaniitti barreeffamaan erguun isaanii ni yaadatama. Barreessaa olaanaa dhaabbata Mootummoota Gamtoomanii Antooniyoo Guuteerez waldhabdee waraanaa naannichatti uumamaa jiruuf yaaddoo qaban ibsuun, gareen hundi waliigaltee nagaa Preetooriyaa akka kabajan gaafataniiru.