በአርሲ ዞን በንጹሃን ላይ እየተፈጸመ ያለውን ግድያ ፓርቲዎች እና ተቋማት አወገዙ

በኦሮሚያ ክልል አርሲ ዞን በተደጋጋሚ በንጹሃን ዜጎች ላይ እየተፈጸመ ያለው ግድያ ከፍተኛ ትችት እያስተናገደ ይገኛል። የኢትዮጵያ ኦርቶዶክስ ተዋህዶ ቤተክርስቲያን በመስከረም ወር ብቻ በሁለት ወረዳዎች 60 ምዕመናን መገደላቸውን በመጥቀስ፣ ለመንግስት የጸጥታ አካላት ተደጋጋሚ ጥሪ ማቅረቧን አስታውቃለች። የኢትዮጵያ ሰብዓዊ መብቶች ኮሚሽንም የዜጎች ደህንነት እንዲጠበቅ መንግስት ኃላፊነቱን እንዲወጣ አሳስቧል።

የአማራ ብሔራዊ ንቅናቄ (አብን)ን ጨምሮ ኢዜማ፣ እናት ፓርቲ እና መኢዓድ ጥቃቱን አውግዘዋል። ፓርቲዎቹ መንግስት የዜጎችን ህይወት ለመጠበቅ የነበረውን ህገ-መንግስታዊ ግዴታ መወጣት ተስኖታል ሲሉ ወቅሰዋል። በተለይም በአርሲ ሽርካ የሚፈጸመው ጥቃት የመንግስት መዋቅራዊ ድክመት መሆኑን በመግለጽ፣ ከንግግር ባለፈ ተግባራዊ እርምጃ እንዲወሰድና ወንጀለኞች ለፍርድ እንዲቀርቡ ጠይቀዋል።