ኣብ ዞባ አርሲ ኣብ ልዕሊ ንጹሃን ሰባት ዝፍጸም ዘሎ ቅትለት ሰልፍታትን ትካላትን ኮኒኖም

ኣብ ዞባ አርሲ ክልል ኦሮሚያ ኣብ ልዕሊ ንጹሃን ሰባት ዝፍጸም ዘሎ ቅትለት ዓቢይ ነቐፌታ የጋጥሞ ኣሎ። ቤተ ክርስትያን ኦርቶዶክስ ተዋህዶ ኢትዮጵያ ኣብ ወርሒ መስከረም ጥራይ ኣብ ክልተ ወረዳታት 60 ምእመናን ከምዝተቐትሉ ብምሕባር፡ ንዝምልከቶም ኣካላት ጸጥታ መንግስቲ ደጋጊማ ጻውዒት ከምዘቕረበት ኣፍሊጣ። ኮሚሽን ሰብኣዊ መሰላት ኢትዮጵያ እውን መንግስቲ ድሕንነት ዜጋታት ንምሕላው ግቡኡ ክዋጻእ ኣተሓሳሲቡ ኣሎ።

ንቅናቄ ኣማራ (ኣብን) ሓዊሱ ኢዜማ፡ ፓርቲ እናትን መኢኣድን እቲ መጥቃዕቲ ኮኒኖምዎ። እቶም ሰልፍታት መንግስቲ ድሕንነት ዜጋታት ናይ ምሕላው ቅዋማዊ ግቡኡ ከማልእ ከምዘይከኣለ ከምዝወቐሱ ገሊጾም። ብፍላይ ኣብ አርሲ ሽርካ ዝፍጸም ዘሎ መጥቃዕቲ ድኽመት መዋቕር መንግስቲ ምዃኑ ብምሕባር፡ ካብ ዘረባ ሓሊፉ ተግባራዊ ስጉምቲ ክውሰድን ገበኛታት ናብ ፍትሒ ክቐርቡን ጠሊቦም።