በተለያዩ የሀገሪቱ አካባቢዎች ወጣቶች በግዳጅ እየተመለመሉ መሆኑ ተገለጸ

በኢትዮጵያ በተለያዩ አካባቢዎች ወጣቶች ያለፍላጎታቸው በመንገድና በየአካባቢው በግዳጅ እየተያዙ (አፈሳ) ወደ ወታደራዊ ስልጠና ወይም ግዳጅ እንደሚወሰዱ ወጣቶች ለዝግጅታችን ገልጸዋል። በወላይታ ሶዶ፣ በደቡብ ወሎ፣ በኦሮሚያ እና በደቡብ ምዕራብ ኢትዮጵያ የሚኖሩ ወጣቶች በየአካባቢው በሚታዩ ሚሊሻዎች እየተያዙ ስጋት እንደፈጠረባቸው አስታውቀዋል። በተለይም ማታ ማታ የሚበዛው ይህ ድርጊት ወጣቶች በነፃነት እንዳይንቀሳቀሱና ስራ እንዳይሰሩ አግዷቸዋል።

አንዳንድ ወጣቶች ይህ ድርጊት የቀበሌ ኮታን ለመሙላት የሚፈጸም መሆኑን የሚጠቁሙ ሲሆን፣ የቤተሰብ ድጋፍ የሌላቸው ወይም ገንዘብ የሌላቸው ወጣቶች ተጎጂ እንደሆኑ ይናገራሉ። የመንግስት አካላት ለዚህ ድርጊት የተለየ ግዳጅ እንዳልሰጡ የገለጹ ቢሆንም፣ በተግባር ግን በአካባቢዎች የሚፈጸመው አፈሳ ህዝብን እያሳሰበ ይገኛል። አንዳንድ አካባቢዎች የህዝብ ተቃውሞ በመኖሩ አፈሳው የቀነሰ ቢመስልም፣ በአጠቃላይ ግን ወጣቶች በፍርሃት እና በስጋት ውስጥ መሆናቸውን ገልጸዋል።