ኣብ ዝተፈላለዩ ከባቢያት ኢትዮጵያ መንእሰያት ብግዲ ይውሰዱ ምህላው ተገሊጹ

ኣብ ዝተፈላለዩ ከባቢያት ኢትዮጵያ ዝርከቡ መንእሰያት፡ ብግዲ ብመንገዲ ወይ ብኻልኦት ቦታታት ከይተደለዩ እናተታሕዙ ንወተሃደራዊ ስልጠና ወይ ግዴታ ከምዝውሰዱ (አፈሳ) ንዝግጅትና ገሊጾም። ካብ ወላይታ ሶዶ፡ ደቡብ ወሎ፡ ኦሮምያ ከምኡውን ካብ ደቡብ ምዕራብ ኢትዮጵያ ዝነብሩ መንእሰያት፡ ኣብ ከባቢኦም ብዝርከቡ ሚሊሻታት እናተታሕዙ ስግኣት ከምዝፈጠረሎም ኣፍሊጦም። እዚ ድርጊት እዚ ብፍላይ ለይቲ ስለዝበዝሕ፡ መንእሰያት ብናጽነት ከይተንቀሳቀሱ ስራሕ ከይሰርሑ ኣጊድዎም ኣሎ።

ገሊኦም መንእሰያት እዚ ተግባር እዚ ኮታ ቀበሌ ንምምላእ ዝግበር ምዃኑ ዝሕብሩ እንትዀኑ፡ ቤተሰብ ዘይብሎም ወይ ገንዘብ ዘይብሎም መንእሰያት ተጠቒዕቲ ከምዝዀኑ ይገልጹ። መንግስታዊ ኣካላት ንዚ ተግባር እዚ ፍሉይ ግዴታ ከምዘይሃቡ እኳ እንተገለጹ፡ ብተግባር ግና ኣብ ከባቢያት ዝግበር ምሓዝ (ኣፈሳ) ንህዝቢ ኣብ ስግኣት ኣእትይዎ ይርከብ። ኣብ ገሊኦም ከባቢያት ተቓውሞ ህዝቢ ስለዘሎ ምሓዝ ወይ ኣፈሳ ዝነከየ እንተመሰለ፡ ብሓፈሻ ግና መንእሰያት ኣብ ፍርሃትን ስግኣትን ከምዘለዉ ኣፍሊጦም።